Mercenarët rusë me lidhje me spiunët e Moskës kanë rritur praninë e tyre në Ukrainë javët e fundit, duke nxitur frikën midis disa anëtarëve të NATO-s se Rusia mund të përpiqet të krijojë një pretekst për një pushtim, thanë tre burime të larta perëndimore të sigurisë.

Shqetësimet e tyre janë forcuar gjatë javëve të fundit ku u tha se një preteks rus në Ukrainë mund të paraprihej nga një luftë informacioni dhe se mund të ketë rritje të sulmeve kibernetike në Ukrainë, transmeton portal arbresh.info

Rusia gjithashtu mund të përdorë mercenarët për të mbjellë mosmarrëveshje dhe për të paralizuar Ukrainën përmes atentateve në shënjestër dhe përdorimit të armatimit të specializuar, thanë burimet, shkruan “Reuters”.

Shtetet e Bashkuara paralajmëruan sërish të dielën se Rusia mund të organizojë një operacion të rremë brenda Ukrainës, vetëm për të justifikuar pushtimin.

“Ka të ngjarë që mercenarët rusë, nën drejtimin e shtetit rus, do të përfshihen në çdo armiqësi në Ukrainë, duke përfshirë potencialisht një pretekst për një pushtim”, tha një burim i sigurisë perëndimore, i cili foli në kushte anonimiteti.

Burimet perëndimore të sigurisë thanë se mercenarët po vendoseshin nga kompanitë ushtarake private ruse (PMC) me lidhje të ngushta me Shërbimin Federal të Sigurisë (FSB), pasardhësi kryesor i KGB-së së epokës sovjetike dhe agjencia e inteligjencës ushtarake GRU.

Grupet mercenare ruse kanë furnizuar me armë, personel me përvojë të operacioneve speciale dhe trajnime ushtarake për milicitë pro-ruse në Ukrainën lindore, thanë burimet./arbresh.info/